अष्ट्रेलियाली पर्यटकहरू नेपालका लागि धेरै खर्च गर्ने, साहसिक गतिविधिमा रुचि राख्ने र लामो बसाइ गर्ने महत्वपूर्ण बजारका रूपमा स्थापित भइरहेका छन्। पछिल्ला वर्षहरूमा उनीहरूको यात्रा तालिका, भ्रमणको बदलिदो आयाम, र साहसिक तथा प्रकृतिमुखी गन्तव्यप्रति आकर्षणले नेपालका पर्यटनसंग सम्बन्धित जो कोहीलाई नयाँ अवसर र चुनौतीको संकेत दिएको छ। यस ब्लगमा अष्ट्रेलियाली पर्यटकहरूको नेपाल भ्रमण तालिका, आगामी वर्षहरूमा अपेक्षित आगमनको परिदृश्य, तथा अष्ट्रेलियाली बजार लक्षित गर्न विश्वका अन्य देशहरूले अपनाएका सफल अभ्यासहरूको जानकारी राखिएको छ।

आगमनमा निरन्तर वृद्धि: सन् २०२६ को सुरुआती संकेत झन् सकारात्मक

सन् २०२२ देखि २०२५ सम्म नेपालमा अष्ट्रेलियाली पर्यटक आगमनमा निरन्तर र उल्लेखनीय वृद्धि देखिएको छ। सन् २०२२ मा कुल २६,८९४ रहेको सङ्ख्या सन् २०२३ मा ३८,७९९ पुगेको छ l सन् २०२४ मा ४३,९८० र सन् २०२५ मा ४९,३५७ पुगेको छ।

विशेषगरी सेप्टेम्बर–डिसेम्बर अवधिमा सबैभन्दा बढी अष्ट्रेलियाली पर्यटकहरु नेपाल आउने गर्छन। तर, जनवरी–अप्रिल अवधिमा पनि अष्ट्रेलियाली पर्यटकहरुको सङ्ख्या वर्षेनी वृद्धि भइरहेको छ। सन् २०२६ को लागि जनवरी महिनामा मात्र ४,९५७ अष्ट्रेलियाली पर्यटकहरु नेपाल आए, जुन सङ्ख्या अघिल्ला वर्षहरूको जनवरी महिनाको तुलनामा उल्लेख्य वृद्धि हो। यदि यही प्रवृत्ति कायम रह्यो भने सन् २०२६ मा पनि अष्ट्रेलियाली पर्यटकहरुले नयाँ रेकर्ड कायम गर्न सक्ने सम्भावना देखाएको छ।

Source:  Nepal Tourism Board (2022-2026)

वर्षको पहिलो ६ महिना:  अष्ट्रेलियाली पर्यटकको उत्साहजनक वृद्धि

सन् २०२२ देखि २०२५ सम्मको जनवरी–जुन अवधिको तथ्यांकले अष्ट्रेलियाली पर्यटक आगमनमा स्पष्ट वृद्धि देखाउँछ। जनवरी महिनामा सन् २०२२ मा १,२३१ रहेको संख्या सन् २०२६ मा ४,९५७ पुगेको छ। फेब्रुअरी, मार्च र अप्रिल महिनामा पनि वर्षेनी वृद्धि देखिन्छ, विशेषगरी अप्रिल सन् २०२५ मा ५,३१९ पुग्नु उल्लेखनीय हो। मे र जुन महिनामा तुलनात्मक रूपमा कम आगमन भए पनि सन् २०२२ को तुलनामा सन् २०२५ सम्म स्थिर वृद्धि देखिन्छ। समग्रमा, पहिलो छ महिनाको ट्रेन्डले अष्ट्रेलियाली बजार विस्तारको चरणमा रहेको पुष्टि गर्छ, र सन् २०२६ को प्रारम्भिक संकेतले आगामी वर्ष अझ सकारात्मक हुन सक्ने देखाउँछ।

Source:  Nepal Tourism Board (2022-2026)

जुलाई–डिसेम्बर: अष्ट्रेलियाली पर्यटकको स्पष्ट सिजनल यात्रा तालिका

जुलाईदेखि डिसेम्बरसम्मको तथ्यांकले अष्ट्रेलियाली पर्यटक आगमनमा स्पष्ट सिजनल तालिका देखाउँछ। जुलाई र अगस्टमा तुलनात्मक रूपमा कम अष्ट्रेलियालीहरु नेपाल आउने गर्छन तर सेप्टेम्बरदेखि भने अष्ट्रेलियालीहरुको सङ्ख्या बढ्न थाल्छ।

सन् २०२२ को सेप्टेम्बर महिनामा ४,३७० अष्ट्रेलियालीहरु नेपाल आए भने सन् २०२५ मा यो सङ्ख्या ६,८२४ पुगेको छ। अक्टोबर महिनामा पनि सन् २०२३ र सन् २०२४ मा धेरै अष्ट्रेलियालीहरु नेपाल आए (६,०७५ र ६,९२९)l यो अवस्था सन् २०२५ मा ६,१७७७ मा पुगेको छ।

नोभेम्बर र डिसेम्बरमा पनि सन् २०२२ को तुलनामा सन् २०२५ सम्म निरन्तर वृद्धि देखिन्छ। यसले अष्ट्रेलियाली पर्यटकहरूको मुख्य यात्रा समय नेपाली चाडपर्व नजिक र विशेषगरी ट्रेकिङ र हिमाल दृश्यावलोकन सिजनसँग गहिरो रूपमा जोडिएको छ भन्ने संकेत दिन्छ।

Source:  Nepal Tourism Board (2022-2026)

भक्तपुरमा अष्ट्रेलियाली आकर्षण बढ्दो: तीन वर्षमा देखिएको वृद्धि

सन् २०२१/२२ मा भक्तपुर भ्रमण गर्ने अष्ट्रेलियाली पर्यटक संख्या ३,९३० रहेकोमा सन् २०२४/२५ सम्म आइपुग्दा यो संख्या ४,९६८ पुगेको छ। तीन वर्षको अवधिमा करिब १,००० भन्दा बढीको शुद्ध वृद्धि हुनु भनेको करिब २६% को विस्तार हो l यसले भक्तपुरप्रति अष्ट्रेलियाली पर्यटकहरूको रुचि बढ्दो रहेको स्पष्ट संकेत गर्छ।

यो वृद्धि केवल संख्यात्मक मात्र नभई सांस्कृतिक पर्यटन, सम्पदा अवलोकन, र छोटो बसाइ भ्रमण (day-trip market) मा अष्ट्रेलियाली बजार सुदृढ बन्दै गएको प्रमाणका रूपमा पनि लिन सकिन्छ। काठमाडौं उपत्यकाको सांस्कृतिक सर्किटमा भक्तपुरको स्थान अझ मजबुत हुँदै गएको देखिन्छ।

Source:  Nepal Tourism Board (2022-2026)

पर्वतारोहणमा महिला सहभागिता बढ्दो, सफलता दर पनि सुधारोन्मुख

सन् २०२३ र २०२४ को पर्वतारोहणसम्बन्धी तथ्यांकले अष्ट्रेलियाली सहभागीहरूको संरचनामा सकारात्मक परिवर्तन देखाउँछ। सन् २०२३ मा ६१ पुरुष र १७ महिला सहभागी भएकोमा सन् २०२४ मा पुरुषको संख्या ५५ मा झरे पनि महिला संख्या २४ पुगेको छ l

सफलता संख्यामा पनि समान प्रवृत्ति देखिन्छ — सन् २०२३ मा २१ पुरुष र ४ महिला सफल भएकोमा सन् २०२४ मा १९ पुरुष र ८ महिला सफल भएका छन्। विशेषगरी महिलातर्फ सफलता संख्या दोब्बर हुनु पर्वतारोहण क्षेत्रमा लैङ्गिक सन्तुलन र क्षमता वृद्धिको संकेत हो। समग्रमा, सहभागिताको संरचना अधिक समावेशी बन्दै गएको देखिन्छ।​

Source:  Nepal Tourism Board (2022-2026)

सन् २०२६ मा अष्ट्रेलियाली पर्यटक आगमन:  तीन परिदृश्यहरु

सन् २०२६ को लागि अष्ट्रेलियाली पर्यटकहरूको आगमन अनुमान गर्दा विभिन्न परिदृश्यहरू देखिएका छन्। “अहिलेको अवस्था” अनुसार लगभग ५७,८४२ पर्यटक आउने अपेक्षा गरिएको छ। यदि वृद्धि भयो भने संख्या ~६४,८५१ पुग्न सक्छ भने कम भएमा ~५०,८३३ पर्यटकमा सीमित रहन सक्छ।

यस प्रक्षेपणले नेपालका पर्यटन व्यवसायी र नीति निर्माता दुवैका लागि तयारीको आवश्यकता संकेत गर्दछ। वर्षभरि आगमन असमान रहन सक्ने भएकाले उच्च, मध्यम र न्यूनतम सम्भावित परिदृश्यका आधारमा रणनीति बनाउनु उपयुक्त हुनेछ।

नोट:  ८०% बिश्वास अन्तराल

नेपालको पर्यटन: सिक्नुपर्ने तिन विश्वव्यापी पाठहरु

सन् २०२२ देखि २०२५ सम्म अष्ट्रेलियाली पर्यटकहरूको आगमन निरन्तर वृद्धि भएको छ। सन् २०२२ मा नेपाल आएका अष्ट्रेलियाली पर्यटकहरूको सङ्ख्या करिब २६,८९४ थियो। सन् २०२५ मा यो संख्या ४९,३५७ पुग्यो। सन् २०२६ को जनवरी महिनामा मात्र ४,९५७ अष्ट्रेलियाली पर्यटक नेपाल आए। यही अवस्था रह्यो भने २०२६ मा अष्ट्रेलियाबाट करिब ५७,८४२ देखि ६४,८५१ पर्यटक नेपाल आउने अपेक्षा गर्न सकिन्छ।

यो वृद्धिले संकेत गर्छ कि अष्ट्रेलियालीहरु नेपालका लागि उच्च सम्भावना बोकेका पर्यटकहरु हुन् l सहि रणनीति अवलम्बन गरेमा यसबाट हरेक पर्यटन व्यवसायले फाइदा लिन सक्छ।